Ilakenutk Kisikuwi’skw: Malgalit Labillois,
Luke Simon tley Big Cove

Ula na a’tukwaqn uwjit ta’n amaljikwej temk telimsenkek piptoqi-wi’kasikl uwpikikw aq uwsukunek.

Newt na eykepenik tapusijik nekapikwajik ji’nemuk ta’n wikipenik utank. Me’katu aluwamsisenik. Mu welte’tikekusenik eta mu kis nemiteke’kw aq mu kisi apoqen’masi’kw. Na ela’tijik nipuktuk aq ke’kopa’tijik temoqta’wal. Na’te’l kisite’temi’tisenek siaw-katemenew.

Klu’skap etl we’jiaseni na’tel’ newtikiskekek. Teluwes’, “Koqwey amsala’sik?”

Teluweliseni, “Mu wen puwaluksiwek tepaw. Ma’ kiseyasiwek aq ma’ wen piluwey kisi apoqenem’waqet, na nuku’ pasek siawkat’esenen ula nipuktuk we’kaw empemek”.

Klu’skap eltuwaji wikuwa’m. Toqosep ikenem’waji a’papi’l aq telimaji, “Emtoqal’uk ula a’papi sitemuk. Ta’n ne’wte’ etl’ we’kutesink na kl’pile’n kemujiktuk, aq ektuk kl’pile’n ektla’taqsunemk. Ta’n tuju ketu’ samkwan, na pasek epkasapeka’latesk ektla’taqsunem aq apejiwtenatesk”.

Nike’ amaljikwej kaqikji’toq ta’n teliaq uwjit ula tapusijik ji’nemuk.

“Kiso’qenji’j uwjeka’s ula tapusijik ji’nemuk”, teluwet.

Ta’n tuju newte’jit ji'nem at samkwane’ketek sitemuk, na wesuwa’latl la’taqsunal aq paqesapeka’latl. Amaljikwej kesi wantaqe’k aq gimim-toqiet sitemuk aq ela’latl la’taqsunal tupkwaniktuk.

Ta’n tuju ula nekapikwejit ji’nem wesuwewtunatek a’papi’l, na mu etenuk samkwan ut-la’taqsunumk, pasek tupkwan.

Ta’n tuju apaja’sitek ta’n eymelij witapl, na teluwet, “ Teluwenes eksipu’minu kaqi niwia’k. Pasek tupkwan etek. Mu etenuk samkwan”.

Pasena ektek ji’nem mu ketelamsutuwaql. Telimatl, “Ni’n tel’ta’si pasek ki’l wesam maleyn. Ki’l etuk mu api nemiskemu’n samkwan. Pasek ewsi samkwane’ken”.

Pasena ektek ji’nem teluwet, “Moqwa’, telimul na teliaqewey”.

Ki’s nike’ amaljikwej apaja’sit aq apat-pija’latl la’taqsunal samkwaniktuk. Ta’n tuju tapuwewey nekapikwejit ji’nem metoqietek sipuwiktuk, na apaja’sit aq maw samkwan.

Me’ki’kwaykaq to’q. “Nemitu’n, pekisitu samkwan. Ki’l na pasek maleyn. Ki’l na pasek mu ketu’ nemiskemuwtep samkwan”, telimatl. Poqjin’tijik ji’nemuk.

Amaljikwej mikuwamaji etl wisukwatemi’tij welokutalultimkewey. Newkl wiyusji’jl pitekesen’ wowiktuk. Na tuju Almaljikwej kemutenatkl tapu’kl wiyusji’jl aq aji min’kwasit.

Ta’n tuju amkwesewey ji’nem elietek wowiktuk, na tewaqa’toql tapu’kl wiyusji’jl, aq poqji mit’jit. Ta’n tuju ta’puwewey ji'nem at la’matek, mu etenukek wiyusek uwjit nekem. Ki’sap me’kik’wy’kaq.

“Ki’s na wesamiaq tan tel maleyn aq mu samkwane’kewun, pasena nike’ pajel kemutem’win ent-weloqutalkeweym. Mu etenuk wiyus ula”, telimatl.

“Pasek wesuwa’tuwapn’ tapu’kl wiyusji’jl. Amuj pa me’ tapu’kl wiyusji’jl eskwiyaql” teluwet ektek ji’nem.

Keteloqo Amaljikwej kisa’toq ji’nemuk maten’tinew aq pasek nekm setakopa’sij aq wi’kuwamaji.

Klu’skap pekisink aq pipanimaji, “Koqwey wejin’tioq?”

“O’”, teluwet ta’puwewey ji’nem, “Nekm na tewji male’k jel mu ketu’ nemiskemuk samkwan. Mu to'q etenuk samkwan, to'q katu ni’n metoqia’nek sitemuk na etekep pukolk samkwan. Mu pasek na, ap na jel wesuwa’tuwij entweloqetalkeweym. Mu kek’unemu ta’qi maq’ut’es”.

Klu’skap alapa’sit. Nemiatl amaljikwejl al te’tepjielitl maqamikewiktuk, etl siktelmilitl. Na Klu’skap ankamiw-kji’toq ta’n teliak.

Klu’skap eliyet wikuwa’mji’jiktuk ta’n etek puktew aq wesuwa’toq puksetew. Wesuwa’toq puksetew aq amjaqewi’kek maqtawpiptoqaqik kit’oq’o u’pikikul amaljikwejl.

Telimatl, “Nekemewey na uwjit ta’n tel kemutemjik tapu’kl wiyusji’jl ula nekapikwajik ji’nemuk. Ne’kaw tl’ jilamuksitesk klaman ekjiju’lten ki’l kemutenes. Tel nenulten stike’ kemutenes ta’n tel kaqi pewkwa’sin”.

Toqosep Klu’skap wesuwa’toq puksetew aq ewi’kekl newikl piptoqaqikl amaljikwejal uwsukunek.

“Ula na uwjit ta’n te’sek kisa’tu’n ji’nemuk maten’tinew. Aq mikwite’tesk, eta ta’n telamuka’lul na siyawtektew, ta’n tel kaqi pewkwa’sin”.

Na uwjit me’ nike’ kiskuk, amaljikwej kek’unkl tel jilamu’kl. Teliankamkusit stike’ nujikemutenejit.

KINA’MASUTI

Kepeme’k na mikwite’temen ta’n tuju kisi opela’tiken, stike’ kemutenen kisna kisipkwatu’n wenik matentinew uwjit ekt-eksuwo’qeneml, na ma’ epkije’nuk, stike’ ta’n tela’lup amaljikwej, na ki’l na’tali winmaji-kina’mul’ten. Je telia’ mu wen ankemikji’tuk, ki’l ekji’tesk kisi amsala’tiken, aq kelapis na nakwew ika’ktew ta’n tuju ektekik mimajuwinu’k ekji’taq.

Mu na kelu’lkenuk kisa’lej wenik matentinew. Ke's mu pekije’nuk, na ma’ ku’kenawjik kitapk. Ektekik mimajuwinu’k ekji’taq ta’n tewjiksatemen lukewaqena’tiken, aq jikel’katemu’tak ta’n eymen. Jilapaquwi’kulten stike’ amaljikwej.